Wednesday 22 February 2017

~SAAWAN~

Saawan ka wo ek din tha, jab tumse nazren chaar huin. Aisa laga jaise aasmaan se ghane kaale badalon ka saaya chat raha ho. Meri ruh ne mujhse kaha ki shayad zindagi ko maksad mil gaya hai. Bahar bahut zor ki garjanaa hui par mere andar ke sukoon ki goonj ko dabaa na paayi. Roshni dheere dheere alvida keh rahi thi, maano mere ghamo ko sath liye ja rahi ho. Wahan bijli kadki aur yahan mere dil me ek aawaaz uthi. Jis rah se ab tak akeli guzar rahi thi, us rah par jaane kahan se ek humsafar mil gaya tha. Hawaa ne apna rukh badla aur apne thande jhonkon se un sookhi pattiyon ko sehlaaya. Wo meethi sarsarahat, hamari khamoshi, aur nazren jo lafzon ki mohtaaj na thi, sabne milkar mausam ko khushnuma bana dia. Saawan ki wo pehli pehli boonden chehre ko chookar mere aanchal me aa giri. Ya fir shayad wo khushi me behte aansoon the, kise pata. Tumhaare ehsaas ne meri zindagi ko aise mehkaya tha jaise geeli mitti mehek rahi thi. Main yun jee uthi jaise baagon me phool khil rahe ho. Man me tarang jagi jaise kisi ne bediyan khol di ho. Shayad bandhishon ki ek kaid thi jisme ghut rahi thi ab tak. Tumne aakar riha kia aur us khuli hawa me udte panchiyon ki tarah maine bhi khulke saans li. Kaaynaat ka koi tohfa the shayad tum. Tumhare aane se dil ki banjar zameen phir ek baar zinda ho gayi. Pyaar ki us baarish se kismat ka wo dhundhla aaina saaf ho gaya.
Par barsaat ke mausam ko badalna hi tha. Nahi jaanti kyun, par tumhe mujhse door jaana hi tha. Chod toh gaye ho mujhe us raste par. Lekin wo waqt bhi door nahi jab sooraj ki kirano ko kaale baadal firse apni chaadar me samet lenge aur zindagi phir apni baahen failaye khadi hogi us mod par. Bas thoda aur intezaar hai. Tumhari raah dekhna meri fitrat ban chuki hai aur mujhe aake thaam lena tumhaari aadat. Main sookhi mitti hun jise bhigaaye bina tumhari boondon ka wajood hi adhoora hai. Milungi main tumse phir ek baar, saawan ke usi ek din, sheher ke us paar...


R